21 fevral tarixində Şamaxı İncəsənət Təhsili Mərkəzində Şamaxı Rayon Təhsil Şöbəsinin təşkilatçılığı ilə Beynəlxalq Ana Dili Gününə həsr olunmuş “Ana dilimiz varlığımızdır” adlı tədbir keçirilmişdir. Ana dili ilə bağlı çıxışlar edilmiş, eyni zamanda yanvar ayının əvvəllərindən başlayaraq rayonun ümumi təhsil müəssisələrinin şagirdləri arasında təşkil olunmuş müsabiqənin qalibləri təltif olunmuşdur. Tədbirdə Azərbaycan Milli Elmlər Akademiyasının Nəsimi adına Dilçilik İnstitutunun direktoru, AMEA-nın həqiqi üzvü Möhsün Nağısoylu, rayon rəhbərliyi, rayonun idarə təşkilat rəhbərləri, məktəb direktorları, müəllimlər, valideynlər və şagirdlər iştirak etmişlər. Akademik Möhsün Nağısoylu çıxış edərək Beynəlxalq Ana dili Gününün tarixi haqqında danışıb, bu əlamətdar günün dünyada geniş qeyd olunduğunu bildirmişdir. Dilimizin qorunub saxlanmasında və saflaşdırılmasında Ümummilli liderimiz Heydər Əliyevin müstəsna xidmətləri olduğunu qeyd edən natiq bu gün Azərbaycan dilinin bir çox dillərə nisbətən daha saf və zəngin olduğunu ifadə etmişdir. Hörmətli qonaq Şamaxıda belə bir tədbirin təşkil olunmasından razılığını bildirmiş, təşkilatçılara ana dilimizə göstərdikləri diqqətə görə təşəkkür etmişdir. Daha sonra çıxış edən digər qonaqlar  Ana dilimizin  gənc nəsilə öyrədilməsində və sevdirilməsində bu tədbirin  əhəmiyyətindən danışmışdırlar.

Qrammatika və şeir kateqoriyası üzrə təşkil olunmuş müsabiqə məktəb, yarımfinal və final turlarından ibarət olmaqla ümumilikdə 3000 şagirdi əhatə etmişdir. Qrammatika kateqoriyası üzrə V-IX siniflər üzrə olmaqla 15 nəfər qalib, 14 nəfər final iştirakçısı, şeir kateqoriyası üzrə V-X siniflər üzrə 5 nəfər qalibə fəxri fərman və qiymətli hədiyyələr təqdim olunmuşdur. Tədbir şeir kateqoriyasında qalib gəlmiş şagirdlərin ifasında bədii hissə ilə davam etdirilmişdir.